أمشى أمشى يا ديك ...اللعبة دى مش ليك

خلاص كده أنا اتخرخت رسمى من كلية الاعلام و بتقدير امتياز كمان بس تقتكروا ايه اللى ممكن يحصل ليا بعد كده ....(بينى و بنكم أنا مش عايزة أعرف ) بس من ساعات ما اتخرجت و فى كام حاجة كدة واخده بالى انهم مأثرين على العقول المصرية:اول سؤال طنط فتكات ....

و ده سؤال اى خريج جديد و خصوصاً لو بنت هتتعرض له و السؤال كالاتى :" مبروك يا حبيبتى ، يلا بقى عايزين نفرح بيكى ...بسرعة كده....مافيش حاجة قريب؟؟!! "  و انتى مال أهل حضرتك يعنى؟! و نفسى أعرف و اوجه سؤال  ....هو أنا بتخرج و أخذ شهادة علشان اتجوز بيها و لا علشان اشتغل بيها؟ ...ازاى نكون فى 2010 و لسه لحد دلوقتى بعقلية البنت ملهاش غير الجواز حتى لو جابت امتياز و تفوقت فى دراستها ، ازاى يكون طموحى بس جوزى و عيالى....طب ما زوجى ده عايز واحدة مثقفة و متعلمة يتشرف بيها فى المجتمع ( غير طبعاً لو راجل عنده عقد نقص) و ولادى مش فى يوم من الايام عايزين أب و أم يفتخروا بيهم...يبقى طنط فتكات دى ياريت تجيب لسانها و تحطه فى فمها و كفايا بقى تأخر

السؤال التانى مش سؤال على قد ما هو استفزاز ...أنا زى ما قلت أنا خريجة إعلام و كمان قسم صحافة و من ساعات ما اتخرجت ،و اللى على لسان الناس تفاؤل رهيييييييييب " صحافة ايه يا بنتى و اهرام ايه ، ده عالم ذكورى و ديه بلد تيييييييييييت....و كلام بقى يخليك متفائل موووووووووووت" بس على مين ...الفكرة يا جماعة أنا عارفة بل و متاكدة ان الطريق صعب جداً  و كل مطبات بس أكيد فى يوم هحقق اللى نفسى فى و ربنا بصراحة دايماً معايا و كل خطوة كنت فيها كان ساندنى...يبقى ليه أم التشاؤم ده و لا دى بقت خصلة مصرية؟ ....و على رأى المثل " لو دامت لك ، ماكنتش راحت لغيرك " يعنى و لومؤخذة أكيد الصحفين اللى فى الاهرام و المصرى اليوم و الاخبار و كل الجرايد اللى حوالينا مش دايمين و لو حته حاجزين مدة و لا مدتين ...مش هيفضلوا بنفس الكفأة بتاع الجيل الجديد ..السن برده ، و علشان كده أنا ردى الوحيد لكل واحد حاول يهبطنى و يكسر مأديفى " أمشى ، أمشى يا ديك الفرخة (اى تكسير عزيمتى) دى مش ليك "...وده أخر كلام 

نصيحة بقى لكل واحد فريش جراديواتيت ( خريج طازة) ...ترجمة فورية...خلى عندك أمل لان الأمل دى الحاجة الوحيدة اللى ملكك بجد و كمان مش دافع فيها فلوس فلو راحت مش هتعرف تعيش ...و احلم على قد ما تقدر و تأكد " لو خادونى أنا مذيعة أكيد ممكن تبقى رئيس قناة " بعنى بالبلدى كده مافيش مستحيل غير فى القواميس و سيبك من طنط فتكات و عصر سى السيد و مافيش فايده.... و الكلام اللى مش بيأكل عيش ده