دموع قهوة

أنا قهوة صحيح بس أمينة على اسرار زباينى,بس المرة دى مش قادرة أخبى و لا قادره ادارى أكتر من كده....فى الأول اقولكم أنا مين ,أنا مش قهوة عادية ده أنا كافية و على الغالى متربية ,أنا فى حتة شعبية بس بيجى عليا السواح من كل حتة شوية....ديه مش فزورة بس أنا قلت اعرفكم بنفسى الاول...المهم ..فى يوم ماكنش برد اوى ولا كان حر..دخل عليا اتنين شاكلهم كده بيحبوا بعض  وواضح كمان انهم كانوا بيدوروا على مكان ولما مأقدروش يوصلوا للمكان ده,قالوا نقعد نستريح شوية....المهم لما دخلوا مقعادوش قدام بعض زى ما الكراسى موجوده عندى ,لاقيت الاستاذ بيحرك الكرسى و جابوا جنب البنوتة اللى كانت لابسة أحمر فى أسود و قرب جانبها و مسك ايدها........ بسسسسسسس كده ماتفتكروش اكتر من كده زى الافلام و مش علشان أنا كافية محترم لأ علشان كمان الاتنين دول كانوا شكلهم فعلا محترم....المهم فضلوا يحكوا و يتكلموا سوا و الاقى البنت بتتكلم مرة بحنية و مرة تانية الاقيها زى الطفلة اللى بتحكى لباباها عن حدوتةاو أغنية...بصراحة قلت أرمى ودانى شوية لقيتوا بيقولها " مستحيل اسيبك يا قلبى...انت ليا العمر كله"و هى ساكتة وواثقة جدا فى كلامه ليها.و بعد شوية لما الدنيا بدأت تسدل ستار النهار و بدأ الليل يقول هاى..مشيوا هم الاتنين و ايدهم متلحمين ضد اى عوائق ممكن تيجى فى الطريق...
و مرت الايام و الاسابيع و عقلى و قلبى مانساش الاتنين دول و كنت حاسة انى هاشوفهم تانى...و فعلا و فى يوم كان برد شديد و الدنيا بتقول فيه يا فكيك....لاقيت الاتنين داخلين بس شاكلهم كده مش متفقين ,قلت فى عقل بالى عادى سوء تفاهم و قبل ما يمشوا هيكون اتناسى, قعدت البنت فى نفس المكان و لاقيتها قالت له "مش عايز حاته تقعد جنبى زى المرة اللى فاتت".."
 رد عليها بكل قوة " كده أحسن"..و فجأة السما مطرت بس مش السما اللى انتوا عارفنها, المرة دى كانت عيون البنت و فضلت تبكى و تقوله " طب قولى ليه هاتسبنى مش انت لسه كنت واعدنى عمرك ما هتسبنى" و اللاقى الاستاذ يقولها " ارجوكى مأقدرش أشوف دموعك, المشكلة أكبر منى و لو عرفت احلها هرجعلك تانى ...حبيبتى أنا عمرى ما هسيبك وعمرى ما هحب حد غيرك...أرجوكى كفايا عياط بقى"...عارفين كان ايه شعورى فى اللحظة دى كنت عايزه امسك البيه الاستاذ ده و أقول له يا راجل انت اعمى مش شايف البنت بتحبك ازاى دى كمان باست ايدك و قالت لك ماتسبنيش...حد يسيب واحده بتحبه كده ...ده انت تمسك فيها و تتحدى الدنيا كلها و هى معاك و تواجه اى صعوبات ...بس يا خسارة مالاقيتش نفسى غير ساكته و بتألم جوايا و دموعى حزينة على البنت الجميلة...وبعد ما البنت مالاقيتش أمل فى الرجوع غير أنها تحافظ شوية على الباقى من كرامتها بعد ما راضيت انها تبوس على ايده,قاموا هما الاتنين بس المرة دى مش متلحمين بلأيدبن,كل واحد ماشى جنب التانى زى الغرباء عن بعض,قلت فى عقل بالى اتجسس بنظرى عليهم يمكن قلبه يحن و يقولها دى كانت لعبة بيخة يا حبيبتى او كدبة أبريل بس جاية فى يناير بدرى شوية بس خلصت خلاص...لاقيتهم وقفوا........قلبى نط و قال هيرجع...بصيت لاقيتها مسكت جاكيتوه و قربته ليها زى اللى عايزه تصرخ و تقول حرام يا دنيا ده احنا كنا حبايب و قلنا عمرك ما هتيجى علينا بس لاقيتها ساكتة و دموعها بس هى اللى نازلة و عنيها عليه و هو بينزل اكمامه علشان الدنيا برد و اخذ الجاكيت منها و ليبسوا بكل هدوء وقلبه زى الثلج ....وفضلت عينى عليهم لاحد ما الشارع حضنهم بعيد بعيد عليا,الاتنين دول بجد عمرى ما هنساهم و عندى لسه أمل بعيد انى أشوفهم تانى....      ."  ... 

مصريين

ايه اللى بيحصل فيكى يا بلد؟؟....بجدحاجة تحرق الدم...و المصيبة اننا سايبين نفسنا للغرب  تتفرج علينا و تقول اننا بنموت بعض و المسلمين و المسيحين بيقتلوا فى بعض....بيقتلوا فى بعض ازاى؟؟ و احنا اللى اتربينا مع بعض و فرحنا مع بعض و المصايب لما بتيجى مش بتفرق ده مسلم و لا مسيحى و الرزق لما بيجى مش بيقول ده مسلم و لا ده مسيحى...يبجى علينا و خلاص كلنا.....ليه كل حادثة بتحصل فى البلد دلوقتى نحولها الى مذبحة طائفية و نقول بين مسلم ومسيحى و لو بين مسيحى و مسيحى او مسلم و مسلم نسكت؟؟ ...ليه مانقولش انها بين مصريين ...ايوه مصريين نسيوا يعنى ايه ادمية...نسيوا يعنى اية محبة ...نسيوا يعنى ايه نبقى ايد واحدة فى وش كل اللى عايزين يفرقونا و يهزوا  اسم مصر, أرض الاديان كلها اللى اسمها اتذكر فى الانجيل و القران و اتبارك شعبها...ليه يا مصريين؟؟ سايبين حثالة زى قناة الجزيرة(قطر) تشمت فينا و سايبيين عيال مصر رفضت بنوتهم من اقباط المهجر يهيجوا الدنيا علينا بره...ليه سايبيين نفسنا كده؟؟ و احنا اللى ممكن نحط ادينا فى ايد بعض زى زمان ونفتكر ان ربك وربى هو واحد و اللى بيجمعنا هو اننا كلنا ولادك يا بلد ...مصريين...   

انت و قلبك....

الناس كلها بتتكلم على ظهور العذراء فى اماكن كتيرة زى الوراق و شبرا و ارض الجولف و اماكن كتيرة ....فجأه لاقيت كل الاعلام و البرامج نازلة كلام فى الموضوع ده....بصراحة أنا مش عارفة ....بس أنا وعيت على الدنيا و انا بسمع ان العدرا ظهرت فى الزيتون 1969 ...و ظهرت فى بابا دبلو و من كام سنة كده ظهرت فى اسيوط....بس لو سألتنى شفتى حاجة؟؟؟ ...الصراحة لا....علشان ان اصلا مقتنعة انى ماستهلش اشوف ظهورات زى دى...انا فين و امى العدرا فين؟؟زى ما بيقولوا "راح يروح فين الصعلوك بين الملوك"...الفكرة انى مصدقة جدا و متاكده انها ظهرت فى الوراق وبتظهر و هتظهر تانى و تالت فى مصر و فى حتت كتيرة فى العالم و مؤمنة بالظهورات بس ساعات بحس ان الناس بتبالغ و تزيد فى الحكايات و كل واحد لازم و هو بيحكى يحط الحته بتاعته فى الحكاية.....تأليفه يعنى و ده عادى علشان ده طبع البنأدمين مسيحين ,مسلمين او حتى ايه....المهم علشان الوقت و علشان عندى امتحانات...اللى مأمن من قلبه انه ممكن يشوف العدرا هيشوفها و اللى بيضحك و بيستهزأ مش هايشوفها عمره ...اصل العدرا و الناس القديسين دول مش مستنين يثبتوانفسهم لينا او حتى يخلوا الناس يأمنوا بيهم بس هم بيظهروا علشان حبهم لينا و يطلوا علينا و يشجعونا على مواصلة الحياة فى ظل كل الظروف الصعبة دى....ده كان رأي...و براحتى أعبر عنه
...

غورى يا 2009....و تعالى فى حضنى يا 2010..

مع السلامة ..مع السلامة ..و امشى مش عايزة اشوف وشك تانى يا 2009...ايوه...من اول شهر فيكى و انت شايفه نفسك اوى و نازله تخبيط فينا كلنا و نقولك يا ستى يهديكى ,يرضيكى و انت مافيش فايدة ...اديكى اهوه ماشية و رايحة فى داهية و ما حدش سأل فيكى و لا حتى ندمان عليكى ...من امورك السودة يا طنط 2009...يمكن ساعات قليلة كنت حلوه و بنت ناس بس برده مش بحبك و مش عايزه افتكرك و لو حتى ببلاش...و انت بقى يا مدام 2010 ...هتعملى ايه؟؟ و ناويالنا على ايه؟؟...هتحبينى  و لا هتورينى؟؟...هتفرحينى و لا هتبكينى ؟؟...خايفة منك أنا يا 2010...بس عندى ثقة لو انتى كبيرة فى اللى أكبر منك ...ربنا و هو اللى قادر يهديكى عليا لو فكرتى تبكينى او حتى تزعلينى.....و على فكرة انا متعشمه فيكى خير و حاسة ان احنا ممكن نبقى صحاب حلوين...يالا كفايا عليكى كده لحد ما نشوف هتعملى ايه يا حلوه.... 

كلام لازم يتقال قبل 2010

علشان أنا برج الميزان و معروف ان البرج ده عادل.......عايزه اقول حبة حاجات قبل ما ينزل الستار على 2009
........ياه السنة دى بجد كانت ماشية على بساط سحرى...بأمانة أنا مش عارفة بدأت ازاى و خلصت بالسرعة دى ازاى؟؟؟..و المصيبة انها بالرغم انها سريعة جدا الا انها حصل فيها حاجات تشيب و اللى يعرفنى هيعرف موضوع يشيب و الشعر الابيض و كده يعنى.....ما علينا المهم وعلشان الرغى الكتير و كده هدخل فى الموضوع  كانت سنة السنين بالنسبة ليا......يعنى كل شهر فيها كان حكاية من رحيل و فرح و بكاء و حياة جديدة بس اهم حاجة بالنسبة ليا كانت زيارة سحن القناطر للنسا علشان مشروع التخرخ بتاعى...ده بجد اللى كان حكاية...الفكرة بدأت بالنسبة ليا على انها تحدى لكل واحد فضل يضحك و يقول دى مجنونة ...ايه الهبل ده؟؟؟...ماكنش مشروع تخرج ده؟؟؟ ليه البهدله دى؟؟؟ و كلام بنات مالوش لازمة و اجارك الله من كلام البنات بقى...بصراحة الحكاية بالنسبة ليا مش مشروع و ادلق للدكتور و اخلص ..الفكرة انى اعمل حاجة جديدة و مميزة ...افتخر بعد كده انى عملتها...و لو الحكاية حكاية تقدير...كل الناس بتجيب دلوقتى تقدير...بس مين فعلا بيستمتع و هو بيشتغل فى مشروعه؟؟؟..نرجع لموضوع السجن ده...من غير كلام كتير اخد منى وقت و مجهود كبير لحد ما روحت انا و اصحابى السجن و طلعت باكتر من نتيجة ممكن ماتعجبكومش: 1- ممكن تاخد اللى انت عايزه من غير وسطة و الحجج اللى الناس بتقولها.2- وزارة الداخلية دى بجد وزارة محترمة لانهم كانوا ممكن اول مل شافونى رايحة عايزه اذن لزيارة السجن كانوا ممكن يقولولى روحى يا شطرة...بس بجد الناس هناك محترمين بشكل يخوفك و على فكرة ده مش رأى أنا بس ده رأى اصحابى و المساجين اللى هناك "وزارة الداخلية بقت حاجة تانية خالص غير زمان"...3- لو بتحب مصر...افضل حبها كده و خليك متفائل و بص على الحاجات الحلوه اللى فيها و خد المثل ده برهان على كلامى...انت بتحب مامتك مش علشان هى احلى ام مثلآ و لا علشان اجمل امرأة فى الدنيا بس علشان هى أمك ...هى كده ...مصر فيها كل البلاوى الزرقة بس هى مصر بلدى ...روحت و جيت أنا برضه مصرى..و ادعى عليها و اكره اللى يقول أمين...و اديكوا شفتوا مثل حى (أنا) ..حتت طالبة و لا راحت و لا جت و احتراموها اخر احترام و لا كانها بنت وزير الداخلية ... ...ياريت يا جماعة بجد نبطل نكرر كلام بعض من غير ما نحاول احنا الاول...يعنىالناس تقولك" البلد فيها رشاوى و كله وسطة"...طب انت جربت ؟؟؟ ..لأ ...قالولى......بخرب بيت الكلمة دى..كل ما تسأل حد عرفت منين الكلام ده؟؟ يقولك ..قالولى...فى ايه يا بلد؟؟ معلوماتنا بقت كلها من كتاب قالولى..جرب الاول و بعد كده احكم و هتلاقى ان 80% من اللى قالولك غلط..فيه حاجه اخيره عايزه اقولها ...الناس فى السجن مش ناس مجانين و لا جربانين و لا بيقتلوا فى بعض و لا عايشين فى غابة زى ما الناس فاكره و الاعلام صور....و لا زى فيلم يا أنا ياخالتى و لا زى رغدة و حسين فهمى(85 جنايات) ..السجن سجن بس الناس اللى فيه بيتعاقبوه على اللى عملوه غلط و ندمانين بس الدور و الباقى علينا احنا اللى ممكن نعمل حاجات غلط فى السر و نفلت من العقاب و يفضل بس العقاب السماوىاللى ماحدش ممكن يفلت منه...!!!!!
هو ده الكلام اللى كنت لازم اكتبه قبل ما تخلص السنة دى ...علشان كانوا محشورين جوايا.
التوقيع:
واحدة متفائلة او مجنونة ...زى ما تحبوا 


 
  

الى الغربة

...المرة دى أنا باكتب الى الغربة.......غربة اى حد فينا ...الغربة مش شرط تكون بعيد عن وطنك ,حبيبك او انسان معين بس الغربة اللى جواك انت......

يمكن يكون بنا بحور....يمكن يكون بنا مبانى...يمكن يكون البعد غالى ...يمكن ماشوفكش مرة تانى...لكن فى قلبى انت عايش...انت ساكن جوه كيانى...و لو فى يوم حبيت أشوفك,يدوب كده أغمض عيونى...و أفتكر دايما ان انت ساكن عقلى و خيالى

(جميع الحقوق محفوظة)

منك يا دنيا أنا زعلانة